عبدالغنی‌برادر، معاون نخست‌وزیر طالبان، تاجیکستان را به‌ مداخله در امور داخلی افغانستان متهم کرده است. او روز گذشته (یک‌شنبه، ۴ میزان) در مصاحبه‌ی با شبکه‌ تلویزیونی الجزیره، به تاجیکستان نسبت به پیامدهای احتمالی دخالت در امور افغانستان هشدار داده است.

این درحالیست که امام‌علی رحمان، رییس‌جمهور تاجیکستان چند روز پیش در جریان سخن‌رانی‌اش در نشست سازمان همکاری‌های شانگهای در دوشنبه، پیشنهاد ایجاد کمربند امنیتی در اطراف افغانستان را مطرح کرده بود. آقای رحمان گفته بود که کمربند امنیتی از گسترش احتمالی گروه‌های تروریستی جلوگیری می‌کند. امام‌علی رحمان در هفتادوششمین نشست مجمع عمومی سازمان ملل متحد نیز گفته بود که تحولات اخیر در افغانستان منجر به بحران عمیق سیاسی، بشردوستانه و حکومتی شده و امنیت و ثبات منطقه را نیز به خطر می‌اندازد.