امارت اسلامی بار دیگر خواستار بازگرداندن طیاره‌های افغانستان از کشورهای همسایه شده است.

وزارت دفاع امارت اسلامی بار دیگر از تاجیکستان و اوزبکیستان خواست هواپیماهای منتقل شده از افغانستان را به این کشور بازگردانند. عنایت‌الله خوارزمی سخن‌گوی وزارت دفاع طالبان از مقام‌های تاجیکستان و اوزبیکستان خواست تا هواپیماهای متعلق به افغانستان که در سقوط کابل از این کشور خارج شده بود را به افغانستان تحویل دهند.

چندی پیش نیز ملامحمد یعقوب وزیر دفاع طالبان با تاکید بر لزوم تحویل این تجهیزات، هشدار داده بود که تاجیکستان و اوزبیکستان نباید حوصله طالبان را بیازمایند.

این در حالی‌است که جنرال مایکل اریک کوریلا فرمانده ستاد فرماندهی مرکزی ارتش آمریکا “سنتکام” اخیرا در دیدار با رییس‌جمهور تاجیکستان اعلام کرد که واشنگتن ممکن است به تاجیکستان اجازه دهد تا هواپیماهای نظامی افغانستان را که هنگام سقوط کابل توسط خلبان‌‌های پناهنده افغانستان به این کشور منتقل شده بود را حفظ کند.

کوریلا دراین‌ باره تصریح کرده بود که هواپیماهای انتقال داده شده قطعا به افغانستان بازگردانده نخواهد شد.

هم‌چنان عصمت‌الله ارگاشف مشاور ارشد رییس‌جمهور اوزبیکستان نیز با تایید انتقال حدود ۵۰ فروند هواپیمای نیروی هوایی افغانستان به این کشور، تصریح کرده است که این تجهیزات متعلق به امریکا است و به طالبان تحویل داده نخواهد شد.