رستم امامعلی، رییس مجلس تاجیکستان و هان جنگ، معاون رییس‌جمهور چین در بیجینگ پیرامون وضعیت جاری افغانستان گفت‌وگو کردند.

مقام‌های هر دو کشور توافق کردند که همکاری تاجیکستان و چین برای مبارزه با تروریسم و قاچاق مواد مخدر را گسترش دهند. در این دیدار، تاکید شد که دوشنبه و بیجینگ در چارچوب سازمان ملل، سازمان همکاری شانگهای، کنفرانس تعامل و اعتمادسازی در آسیا و نیز سایر سازمان‌های منطقه‌ای و بین‌المللی علیه تروریسم، افراط‌گرایی و جرایم سازمان یافته فراملی همکاری کنند.

درهمین‌حال، شماری از آگاهان سیاسی برای برطرف سازی نگرانی امنیتی کشورهای همسایه پیشنهاد می‌کنند که کمیته منطقه‌ای ناظر بر فعالیت و مبارزه با تروریسم ایجاد شود.

نگرانی امنیتی کشورهای عضو شانگهای که چین و تاجیکستان نیز از اعضای آن اند، موضوع تازه‌ای نیست. پیش از این نیز بارها اعضای این سازمان به‌گونه‌ای جداگانه و مشترک از رشد و فعالیت گروه‌های هراس‌افگن در افغانستان نگرانی‌شان را ابراز کرده‌اند. با این حال، همواره حکومت سرپرست اطمینان داده است که از خاک افغانستان تهدید متوجه هیچ کشوری نخواهد بود.