فرمانده ستاد مرکزی ارتش آمریکا در دیدار با رییس جمهور تاجیکستان بر تأمین امنیت مرزی، میان افغانستان و تاجیکستان تأکید کرده است.

جنرال جوزف ووتل، فرمانده ستاد مرکزی ارتش آمریکا و رییس جمهور تاجیکستان در شهر دوشنبه دیدار و روی تقویت تدابیر امنیتی در مناطق افغانستان و تاجیکستان با هم گفتگو کردند. دفتر رسانه ای کاخ ریاست جمهوری تاجیکستان خبر داده است که جلوگیری از قاچاق مواد مخدر یکی از اهداف اساسی سفر فرمانده ستاد مرکز ارتش آمریکا به دوشنبه بوده است.

هر چند در اعلامیه گفته نشده که چه تصامیم مشخص در این مورد اتخاذ شده؛ اما جرایم سایبری، فعالیت‌ های گروه‌های مافیایی و دهشت افگن و قاچاق مواد مخدر از خطرهایی عمده در مناطق مرزی افغانستان و تاجیکستان گفته می شود.

این در حالیست که هفته گذشته وزیر امنیت تاجیکستان در جریان سفر به کابل با وزیر امور داخله کشور روی مبارزه مشترک با تروریزم و بازداشت مظنونان جرایم سازمان یافته توافق کردند. دو طرف توافق کردند که در جهت تعقیب و بازداشت مظنونان جرایم سازمان یافته و مظنونان جرایم تروریستی گام های عملی بردارند.

با این حال، دفتر رسانه ای کاخ ریاست جمهوری تاجیکستان گفته که امام علی رحمان در باره وضعیت ولایت های شمالی افغانستان نیز با فرمانده ستاد مرکزی ارتش آمریکا گفتگو کرده است. آقای رحمان، در نشست بین ‌المللی مبارزه علیه تروریزم که هفته گذشته در دوشنبه برگزار شد از افزایش فعالیت گروه‌های دهشت افگن در شمال کشور ابراز نگرانی کرده و گفته بود که تاجیکستان در این باره بی ‌تفاوت بوده نمی‌ تواند.

به اساس معلومات کاخ ریاست جمهوری تاجیکستان، امام علی رحمان و جنرال جوزف ووتل برای جلوگیری از فعالیت گروه ‌های تروریستی در شمال افغانستان، روی همکاری با کابل تأکید کرده ‌اند.