پس از آن‌که در افغانستان تحول صورت گرفت، کشورهای همسایه به ویژه کشورهای شمال، نگران امنیت مرزهای‌شان با افغانستان شدند.

آنان با برگزاری نشست‌های متعدد و تقویت امنیت مرزهای‌شان، رزمایش‌های نظامی نیز انجام دادند. حالا و در تازه‌ترین مورد، مقام‌های تاجیکستانی در مورد امنیت مرزی با افغانستان با جنرال مایکل کوریلا فرمانده سنتکام یا فرماندهی مرکزی امریکا دیدار و گفت‌وگو کردند. در این دیدار فرمانده سنتکام گفته که آماده است نیروهای امنیتی تاجیکستان را برای دفاع از مرزهای این کشور با افغانستان آموزش دهد و تجهیز کند. فرمانده سنتکام این را هم گفته است که مرزهای قوی تاجیکستان برای امنیت کل آسیای مرکزی حیاتی است. فرمانده سنتکام تاکید کرده که نیروهای ویژه‌ی امریکا در ۲۰ سال گذشته تجربه وسیعی در مبارزه با تروریزم به دست آورده‌اند و می‌توانند این تجربه را با نیروهای مسلح تاجیکستان شریک کنند. هم‌زمان با این، در اعلامیه‌ای سنتکام آمده که هم‌کاری امنیتی امریکا با نیروهای امنیتی تاجیکستان بر مبارزه با تروریزم و عملیات‌های امنیتی مرزی متمرکز است. گفتنی‌است که پشتی‌بانی سنتکام از تاجیکستان شامل نصب حسگرهای زمینی، تجهیزات مخابراتی و وسایط گزمه برای مرزبانان تاجیکستانی می‌شود. این در حالی‌است که تاجیکستان و دیگر همسایه‌های افغانستان پس از تسلط دوباره‌ی امارت اسلامی بر افغانستان، از احتمال بروز ناامنی در مرز با افغانستان بارها نگرانی کرده‌اند.